Internazionalismoa: Askapenak 25 urte betetzen ditu herrien arteko elkartasuna lantzen

Azaroaren 10an Askapenaren 25. urteurrena ospatzeko Altsasun egun osoko jaialdia egingo da.  

25 urteak ospatzeko abestia

Askapena Hego Euskal Herrian NATOri ezezkoa eman zitzaionean jaio zen, "han hemenka inperialismoaren aurka  gogor" egiten zenean.  "Guzti hari elkartasuna eman asmotan,  hamaika herri garen  arren borroka bakarra dela ohartzen hasi ginen euskaldunok ere" eta "sorreratik jakitun ginen, elkartasunak joan etorrikoa behar zuela,  herri borrokalari batek beste bati eskainia eta jasoa" adierazten dute Askapenatik.  Askapenak gaur arte, irmoki heldu  dio bere konpromezuari,  euskal herriaren askapen sozial eta nazionalean aktiboki parte hartuz. "Jakitun izan baikara, gainerako herriekiko  elkartasunak,  bere gorena, gure herria askatzean, euskal herria estatu sozialista bilakatzean  gauzatuko dela".

Milaka lagun, ehundaka borroka
Milaka izan dira munduan zehar izaniko  euskal brigadistak, ehunka  kanpaina burutuak. Lehen hamarkadan Ertamerika edo Kuba baziren ere jo muga nagusiak, 90eko hamarkada latzetan, kapitalismoaren nagusitasun osoan  La Candona oihanetik,  zapatistak, munduari aurpegia erakusten hasi ziren.  Haiekin batera altzako ziren milaka kilometrotara zeuden  jatorrizko herri zenbait ere. "Mundu uniforme eta globalizatuan, euskaldunak ere europako jatorrizko herritar ginela erakutsi ziguten. Milurtekoarekin batera, prozesu bolivariarra  bigarren eta egiazko independentza baten aldeko egin ahaletan zebilen bitartean, inbasio eta gerra inperialistak areagotzen ari ziren munduan. Eta azken hamarkadan  besteak beste, Palestinar herriarekin   zubi lanak eraikitzen aritu gara,  batez ere , boikot kanpainak burutuz. Bidean ordea, hainbat izan dira erori direnak,  internazionalismoa azken muturrera eramandako euskaldunak; Pakito, Marta, Begoña eta erori diren  guztiak oroitu nahi genituzke" dio Askapenak.

Bide berean, Euskal Herriarekiko elkartasuna landu eta ereiten ibili da Askapena, eta 25 urteotan hainbat izan dira jasotako elkartasun eta babesak. Ezin ahaztu 1994ko   Filtroko gertakari haiek esaterako.   Aurreko hamarkadetan  aldiz,  elkartasun komiteetan antolaturik  eta Euskal Herriaren Lagunak bezala ondoren, konta ezinak izan dira jasotako elkartasun adierazpideak.

Internazionalismo delitu?
Euskal internazionalismoaren aurka eta Askapenaren aurka duela bi urte sarekada burutu zuen espainiar poliziak. Askapenako auziperatuak epaiketaren zain aurkitzen dira gaur egun. "Askapenak baina, aurrera egiteko beharra zuen eta du orain ere. Baina jakitun gara  ez dela nolanahikoa aurrean duguna.Inoiz ezagutu gabeko eraso etengabean  dihardu kapitalismoak: inbasio militarrak burutuz, murrizketak,  estatu kolpeak... Munduko banku eta transnazionalen dikaturan bizi gara. Eta zentzu honetan, Euskal Internazionalismoa inoiz baino beharrezkoagoa da egun. Euskal askapen sozial eta nazionala lagunduko duten bide lagunak behar ditugu, konponbide politikoa babestu eta askatasunerantz gurekin batera joango diren bidaideak . Baina aldi berean, Euskal Herriak,  inperialismoa ahultzen duten prozesuak babestu behar ditu, inperioen hatzaparrak ahultzeraino. Eta azkenik gure herriko eragile eta antolakundeak gainerako borrokez aberastea dagokigu, beharrezko diren  zubi lanak eskainiz", azpimarratzen dute Askapenako kideek.